ہنستا ہوا ہر درد کے صحرا سے گزر جا

 ہنستا ہوا ہر درد کے صحرا سے گُزر جا

دامن پہ زمانے کے خوشی بن کے بکھر جا

کر جائیں گے زخمی تجھے احساس کے پتھر

پھلدار درختوں سے تُو کترا کے گزر جا

موتی ہے تو بن زینتِ آویزۂ فطرت

آنسو ہے تو پھر ٹوٹ کے قدموں میں بکھر جا

یہ درس ملا رہ کے مجھے شہرِ انا میں

جس سمت ہو دنیا کی ہوا تُو بھی اُدھر جا

ہر آنکھ بتاتی ہے پتہ تیری گلی کا

ہر چہرہ یہ کہتا ہے کہ جا تُو بھی اُدھر جا

ممکن ہے کہ گزریں وہ کسی روز اِدھر سے

آ، ریت کی مانند سرِ راہ بکھر جا

کیا غم جو زمانے نے بُھلایا تجھے سنبل

اب توڑ دے پیمان وفا تُو بھی مُکر جا

صبیحہ سنبل