پہچان کی تلاش
یہاں ایک شیشم تھا
ہوا میلوں سفر طے کرتی تھی
جس کے پتوں سے گفتگو کے لیے
اور یہاں ایک میدان
خامشی کے بدن میں مقیّد
اپنے وسیع دامن کے ساتھ
قدموں کی چاپ سنتا ہوا
یہاں ایک گلی تھی
تھک کے بیٹھی ہوئی
جس کی مہک تمام گلیوں سے جدا تھی
اور جس میں گونجتی قدموں کی مانوس آواز
میرے کانوں کے پردے پر بیٹھی رہ گئی
یہاں کبوتر اپنی پرواز ختم کرتے تھے
ایک مکان کی چھت پر
چڑیا اپنی دوپہر بانٹتی تھی
بنیرے اسے اپنا کاندھا پیش کرتے تھے
چہکار کا وزن اٹھانے کے لیے
یہاں ایک شہر بھی تھا
جس کی سڑکوں کے دل پہ
میں آوارگی کا بوجھ تھا
وہ اب کہیں نہیں ملتا
یہیں کہیں سینے میں ایک دل تھا
نہیں، وہ اب بھی ہے
جو بات بات پہ ڈوبنے لگتا ہے
یہاں ایک خواب تھا اور یہاں میں
ہم دونوں نے جگہ بدل لی ہے
سارا منظر ایک خواب بن گیا ہے
جس کی تعبیر کی تلاش
ایک گمشدہ شہر کی مانند ہے
اب میں شہر کو تلاش کروں گا
کہ خود سے مل پاؤں
میں جو کہیں دور نکل آیا ہوں
بے سمت کبوتروں کے تعاقب میں
ثاقب ندیم
No comments:
Post a Comment