خوش گمانی کو ذرا سا تو سہارا ہوتا

 خوش گمانی کو ذرا سا تو سہارا ہوتا

آئینہ میری طرح تھوڑا تو جھوٹا ہوتا

تُو کوئی بت نہیں میری ہی طرح انساں ہے

بت بھی ہوتا تو تجھے میں نے تراشا ہوتا

اس کی محفل ہی پہ موقوف نہیں یہ احساس

میں جہاں ہوتا اسی طرح اکیلا ہوتا

میر کے دل کی طرح شام سے بجھ رہتا ہوں

ورنہ سورج کی طرح صبح سے جلتا ہوتا

کیا فقط میرے لیے رہ گئیں سب کی یادیں

کاش یوں ہوتا کہ میں بھی کبھی تنہا ہوتا

بے نیازانہ جو تعبیریں بتاتے ہو ذکا

کبھی اک خواب میری آنکھوں سے دیکھا ہوتا

ذکا صدیقی