عارفانہ کلام منقبت سلام
نجف سے جو طرفداری نہ آئے
تو لطفِ گریہ و زاری نہ آئے
مِرے کام آ گئی میری ملامت
مجھے ملنے کو درباری نہ آئے
نِری تُہمت ہے یاں فنکار ہونا
دعا ہے، تجھ کو فنکاری نہ آئے
تِرے ناٹک جو بھگتاتا رہا ہوں
مجھے کیسے اداکاری نہ آئے
کسی کی بِن بُلائے حاضری ہو
کوئی بیٹھا رہے، باری نہ آئے
بدن سے روح تک اک مرثیہ ہوں
مجھے اب بھی عزاداری نہ آئے
کوئی جھگڑا نہیں ہوتا کہ جب تک
محبت میں سمجھداری نہ آئے
تماشا خاکیوں سے خاک ہوتا؟
تِرے نوری مِرے ناری نہ آئے
قسم ہے ثروت و سارہ کی زریون
کسی پر شام یوں بھاری نہ آئے
علی زریون
No comments:
Post a Comment