کاش چہروں پہ لگے خول اُتارے جاتے
کتنے معصوم تو بے جُرم نہ مارے جاتے
ہم نے بے پرد کیے کتنے بھیانک چہرے
کیوں نہ ہم شہر میں غدار پُکارے جاتے
مر گئے ہیں تو یہ اچھا ہوا ورنہ ہم بھی
کسی چوراہے پہ بے رحمی سے مارے جاتے
ہم نے ہر دور کے فرعون کو للکارا ہے
کیوں نہ ہر ظُلم کی سُولی سے گزارے جاتے
کُند ذہنوں میں جو بھرتے رہے نفرت کی آگ
ان کی خواہش تھی بہت دور شرارے جاتے
مار ڈالے گا زمانہ یہی کہہ کر مجھ کو
زِندہ رہ جاتا تو ایمان سے سارے جاتے
ہم نے باقر نہیں سیکھا تھا خوشامد کرنا
ورنہ اوروں کی طرح بھاگ سنوارے جاتے
مرید باقر انصاری
No comments:
Post a Comment