جب دوست بچھڑتے ہیں پیڑ کی جڑیں زنگ پکڑتی ہیں

جب دوست بچھڑتے ہیں

پیڑ کی جڑیں زنگ پکڑتی ہیں

آسمان بارود اُگلتا ہے

شکاری فلک شگاف قہقہہ لگاتا ہے

اور پرندے کارتوس کی بُو پا کر بے ہوش ہو جاتے ہیں

وزیر بادشاہ کا قتل کر دیتا ہے

شہزادہ سلیمانی چادر اوڑھ کر غائب ہو جاتا ہے

شہزادی اپنی آنکھیں نکال کر سُرخ تھال میں رکھ دیتی ہے

اور وفادار ہرن کے سینگ پگھل کر گِر جاتے ہیں

اندھیرا بڑھتا ہے تو دل گبھراتا ہے

وحشت لپک کر کلیجے میں اُتر آتی ہے

خواب بوڑھے اور نحیف ہو جاتے ہیں

آرزوئیں بِلکنے لگتی ہیں

جب دوست بچھڑتے ہیں

اُداسی کا دُھواں پھیلتا ہے

سوچ مفلوج ہو جاتی ہے

اور سانس کی ڈور کٹ جاتی ہے

ثمر علی

ثمر محمد علی