اے کاش کوئی دیکھے دل و جاں کی بے بسی
ہائے ہمارے عہد کے انساں کی بے بسی
لفظوں میں کیا لکھوں دلِ نالاں کی بے بسی
کس کو بتاؤں ذہنِ پریشاں کی بے بسی
دامن دریدہ چاک گریباں کی بے بسی
دیکھے گا کون شہرِ غریباں کی بے بسی
اب کے بھی آندھیوں میں فقط کچے گھر گرے
تقدیر کا ستم ہے، یا طوفاں کی بے بسی
اپنی زمینیں بانجھ کیوں کرنے پہ تُل گیا
کیسی ہے میرے دیس کے دہقاں کی بے بسی
جو عالمِ افلاس میں بچوں کو کھا گئی
دیکھی ہے بھلا کس نے اس ماں کی بے بسی
ہر موڑ پر جہیز کی دیوار ہے کھڑی
ہائے وہ گھر بسانے کی خواہاں کی بے بسی
کیوں ناچتی ہے اپنے ہی محرم کے سامنے
دیکھے تو کوئی دخترِ عُریاں کی بے بسی
کافر کے سامنے سرِ تسلیمِ خم ہے کیوں
دیکھو تو میرے عہدِ کے مسلماں کی بے بسی
برپا ہے دھڑکنوں میں یہ آشوبِ حشر کیوں
کیسے بیاں کروں دلِ سوزاں کی بے بسی
ہر زخمِ آشکار کی چارہ گری ہے، لیکن
دیکھی نہ جائے دردِ پنہاں کی بے بسی
نیندوں کے بوجھ سے بھی نہ جھپکیں تمام شب
کیسی ہے رتجگوں میں یہ مژگاں کی بے بسی
آنکھوں میں رہ گیا ہے جلے خواب کا دھواں
پلکوں پہ ہونے والے چراغاں کی بے بسی
کیوں ہم رہے ہمیشہ ہی محرومِ برگ و گل
دوشِ خزاں ہے یا کہ گلستاں کی بے بسی
برگشتہ بخت ہاتھوں کے مقدر نِگل گئی
عہدِ وفا سے یکسر گریزاں کی بے بسی
کیونکر مجھے رُلایا ہے اس نے تمام عمر
نہ جانے کیا تھی فطرتِ جاناں کی بے بسی
وہ چاہ کر بھی دُکھ کا مداوا نہ کر سکا
کس سے کہوں میں اپنے درماں کی بے بسی
مجھ کو عطا ہوئے نہ کبھی حرفِ دل دہی
ایسی بھی کیا ہے میرے مہرباں کی بے بسی
پھر گردشِ تقدیر نے پھینکا ہے تیرے دَر پر
لائی کہاں پہ دورِ خراباں کی بے بسی
فرحت تمہارے شہر میں پھرتی ہے دَر بدر
آ، دیکھ بِن بلائے مہماں کی بے بسی
فرحت شکور
No comments:
Post a Comment