آج کسی کی یاد میں ہم جی بھر کر روئے دھویا گھر
آج ہمارا گھر لگتا ہے کیسا اجلا اجلا گھر
اپنے آئیں سر آنکھوں پر غیر کی یہ بیٹھک نہ بنے
گھر آسیب کا بن جائے گا ورنہ ہنستا بستا گھر
گھر کو جب ہم جھاڑیں پوچھیں رہتے ہیں محتاط بہت
گرد آلود نہیں ہونے دیتے ہم ہمسائے کا گھر
تم نے کڑیاں جھیلیں اور غیروں کے گھر آباد کیے
راہ تمہاری تکتا ہے آبائی سونا سونا گھر
جو آرام ہے اپنے گھر میں اور کہاں مل سکتا ہے
ٹوٹا پھوٹا بھی ہو تو بھی اپنا گھر ہے اپنا گھر
اک انجانے ڈر نے نیند اچک لی سب کی آنکھوں سے
کتنی ہی راتوں سے مسلسل بے آرام ہے گھر کا گھر
میری روح بروگن رہ رہ کر چلاتی رہتی ہے
میرا گھر میرا پیارا گھر میرا پیارا پیارا گھر
آوارہ گردی کے سبب وہ دن بھر تو مطعون رہا
جب سورج مغرب میں ڈوبا جعفرؔ بھی جا پہنچا گھر
جعفر بلوچ
No comments:
Post a Comment