عارفانہ کلام نعتیہ کلام
یا خدا حسنِ تخیّل کو نکھر جانے دے
منظرِ شہرِ نبیؐ آنکھ میں بھر لانے دے
جس سے ہر لفظ ہی مقبول مِرا ہو جائے
نعت کہنے کا مدینے میں شرف پانے دے
کوئی جا کر مِرے بارے میں خبر دے یہ انہیںؐ
ٹھوکریں اپنے دیوانے کو تو مت کھانے دے
میں بھی موسیٰؑ کے غلاموں میں گِنا جاؤں گا
مجھ کو اس دور کے فرعون سے ٹکرانے دے
جس نے آباد کیا پھر سے وفاؤں کا چمن
مجھ کو جی بھر کے ابوبکرؓ کے گُن گانے دے
دل مِرا مجھ سے مخاطب یوں مدینے میں ہوا
تُو اگر جاتا ہے جا، مجھ کو تو رہ جانے دے
بابِ جنت پہ اگر روکے کوئی اے صائم
وہؐ کہیں میرا ثناخواں ہے اِسے آنے دے
صائم علوی
No comments:
Post a Comment