جاں ہوا یوں ہوئی اس خال کا بوسہ لے کر

 جاں ہوا یوں ہوئی اس خال کا بوسہ لے کر

جیسے اڑ جائے دہن میں کوئی گٹکا لے کر​

تیرا بیمار نہ سنبھلا جو سنبھالا لے کر​

چپکے ہی بیٹھ رہے دم کو مسیحا لے کر​

شرط ہمت نہیں مجرم ہو گرفتارِ عذاب​

تُو نے کیا چھوڑا اگر چھوڑے گا بدلہ لے کر

​ذبح کرنے کو مِرے پوچھے کیا ہو تکبیر​

تم چھری پھیر بھی دو نام خدا کا لے کر​

کھینچتی روزِ قیامت سے بھی ہے آپ کو دور​

تیری زلفوں کی بلاؤں سے شبِ یلدا لے کر​

مجھ سا مشتاقِ جمال ایک نہ پاؤ گے کہیں​

گرچہ ڈھونڈو گے چراغ رُخ زیبا لے کر​

جبکہ دیکھا نہ ملا مجھ میں کہیں میرا پتا​

پھر گیا نامہ برِ یار خط اُلٹا لے کر​

واں سے یاں آئے تھے اے ذوق کیا لائے تھے​

یاں سے تو جائیں گے ہم لاکھ تمنا لے کر

ابراہیم ذوق