یا رحمۃ للعالمیں اے سبز گنبد کے مکیں

 عارفانہ کلام حمد نعت منقبت

یا رحمۃ للعالمیںﷺ

جب ظلمتیں بڑھنے لگیں، دمکے تھے انوارِ جبیں

اُبھرا تھا مہرِ ضوفشاں، نکھرے تھے افلاک و زمیں

رحمت تمہاری عام تھی، اے سبز گنبد کے مکیں

اے مہمانِ لا مکاں، یا رحمۃ للعالمیںﷺ

اے افتخارِ آرزو، اے آرزوئے دو جہاں

دل پر یہی نقشِ قدم ہے آبروئے لوحِ جاں

اے جلوۂ رحمت نشاں! اے خواجۂﷺ رفعت نشیں

حسن و جمالِ جاوداں، یا رحمۃ للعالمیںﷺ 

اللہ کا احسان ہو، اے تاجدارِ انبیاءﷺ 

ہے نکہتِ گفتار سے مہکی ہوئی اب تک صبا

اے روشنی! اے روشنی! اے مطلعِ صبحِ یقیں

اے باعثِ تحریمِ جاں، یا رحمۃ للعالمیںﷺ

پھر زندگی ویران ہے، دھندلا گئی ہے پھر نظر

اے مہرباں،اے رازداں! اے رہنمائے رہبر

کیوں راستے کجلا گئے، کیوں منزلیں کھوئی گئیں 

حرفِ دعائے کامراں، یا رحمۃ للعالمیںﷺ

اوراق ہیں بکھرے ہوئے اے مصحفِ دینِ مبیں

اپنوں سے رشتہ توڑ کر اپنوں کی آنکھیں جھک گئیں 

مِلت تِری، اُمت تِری، اور یوں پریشان و حزیں

اے التفاتِ بے کراں ، یا رحمۃ للعالمیںﷺ

احساس ہے سویا ہوا، اخلاص نذرانہ نہیں 

انساں کہاں تک آ گیا، انساں کو اندازہ نہیں 

نازِ محبت کیا ہوا، شہرِ محبت کے امیں 

اے اعتبارِ داستاں، یا رحمۃ للعالمیںﷺ

یا سرورِ کون و مکاں! اے نازشِ دنیا و دیں

تم ہو حبیبِﷺ کبریا، تم ہو دعائے مُرسلیں

ہے سجدہ گاہِ قدسیاں یہ آستاں یہ سر زمیں

یا سیدِ روحانیاں، یا رحمۃ للعالمیںﷺ

آقا مِرا آگاہ ہے، میں دل کی حالت کیا کہوں

میں مُو بہ مُو دستِ دعا وہ عین رحمت کیا کہوں

تم ہو وسیلہ آج بھی اے بے مثال و بہتریں

اے درد مندِ بے کساں، یا رحمۃ للعالمیںﷺ

ادا جعفری