ہجر میں جتنا فاصلہ ہو گا

 ہجر میں جتنا فاصلہ ہو گا

اک دِیا پھر بھی جل رہا ہو گا

کس قدر شوقِ خود نمائی ہے

آئینہ خود پہ ہنس رہا ہو گا

حادثہ کل کوئی ہوا تو تھا

شور مٹی میں دب گیا ہو گا

ایک جیسے ہی سارے چہرے ہیں

اب تماشا بھی ایک سا ہو گا

عشق نے کوئی رہ تلاش نہ کی

حجرۂ ذات میں پڑا ہو گا

اپنے دیوارو در کو پھر دیکھیں

کوئی اندر سے ہی خلا ہو گا

نام سنتے ہی رُوٹھ جاتے ہو

کچھ کسی نے تمہیں کہا ہو گا

ہر طرف ایک ہی زمیں ہے تو

آسماں کیا کوئی نیا ہو گا؟

میں بڑی ہوں ردا! سو میرے ساتھ

ظلم بھی تو بہت بڑا ہو گا

ردا فاطمہ