یہ جو باقی ہے محبت کا حوالہ پاگل
یہ حوالہ مِری راتوں کا اجالا پاگل
اتنا آساں نہیں دل سے بُھلانا تجھ کو
کیسے پُھوٹے گا بھلا آنکھ کا چھالا پاگل
لوگ بچھڑے ہیں جو مخلص تھے دعاؤں جیسے
ایسے نقصان کا مشکل ہے ازالہ پاگل
اب میں بکھری ہوئی ترتیب میں آؤں کیسے
کون کرتا ہے کسی پست کو بالا پاگل
ایک چہرے نے جو پابندِ سلاسل رکھا
کیسا مضبوط ہے مکڑی کا یہ جالا پاگل
چند سکوں کے عوض خون جلا نہ ایسے
کون چھینے گا مقدر کا نوالہ پاگل
سُونی چوکھٹ سے نہ دستک کی تُو اُمید لگا
وہ مسافر نہیں اب لوٹنے والا پاگل
کون راتوں کو تِری چاند ستارے دے گا
ٹُوٹ جائے گی جو سانسوں کی یہ مالا پاگل
فوزیہ شیخ
No comments:
Post a Comment