غافل ہے نگہبان کہاں رات گزاروں

یہ شہر ہے انجان کہاں رات گُزاروں

ہے جان نہ پہچان کہاں رات گزاروں

دامن میں لیے پھرتا ہوں میں دولت غم کو

غافل ہے نگہبان کہاں رات گزاروں

کُٹیا تو الگ سایۂ دیوار نہیں ہے

ہر راہ ہے ویران کہاں رات گزاروں

اس راہگزر پر تو شجر بھی نہیں کوئی

اور سر پہ ہے طُوفان کہاں رات گزاروں

بہروپئے پھرتے ہیں ہر اک راہگزر پر

کوئی نہیں انسان کہاں رات گزاروں

در وا ہے کوئی اور نہ دریچہ ہی کُھلا ہے

ہر کُوچہ ہے ویران کہاں رات گزاروں

عشرت کرتپوری