منزلِ جاں کے اجالوں کا اشارا کھو گیا
راستوں کی بھیڑ میں راہی بچارا کھو گیا
بہتے دریا کے بدن کی بے لباسی دیکھنا
ناؤ طوفانوں سے الجھی اور کنارا کھو گیا
روشنی میں آ گئے جب رات کے کالے پہاڑ
صُبح کی گُل رنگ وادی کا نظارا کھو گیا
باغ کے پُھولوں کی خُوشبو میں اُلجھ کر رہ گئے
موسموں کا خُوبصورت استعارا کھو گیا
فکر تہ داریوں کے حُسن کی سرگرمیاں
تجزیے کا مسئلہ سارے کا سارا کھو گیا
کچھ دنوں سے رنگ پر ہے عُمر کے آخر کا کھیل
بُجھ گئے روشن دِیے جینے کا یارا کھو گیا
آنسوؤں کی راہ کھوٹی ہو رہی ہے اے رئیس
رہبری کے شوق میں آنکھوں کا تارا کھو گیا
رئیس الشاکری
No comments:
Post a Comment