خدا کا عبد ہوں اصنام کا غلام نہیں

 عارفانہ کلام حمد نعت منقبت سلام

خدا کا عبد ہوں اصنام کا غلام نہیں

بجز ثنائے محمدﷺ زباں کو کام نہیں

مئے ولائے علیؑ پی کے مست رہتا ہوں

یہ مے وہ ہے کہ شریعت میں جو حرام نہیں

علیؑ کا زور کجا،۔ اور کجا درِ خیبر

سوائے دستِ خدا یہ بشر کا کام نہیں

حسینؑ پشت پہ ہیں اور رسولؐ سجدے میں

نماز بھی تو پیمبرﷺ کی بے امام نہیں

ہر ایک آئے گا محشر میں جب امام کے ساتھ

تو کون کہتا ہے پھر حاجتِ امام نہیں

خدا کے فضل سے اپنا امام ہے موجود

قیامت ان کو ہے جن کا کوئی امام نہیں

یہ زخم کھا کے بھی انصار شہ کے تھے نعرے

بجز حسینؑ ہمارا کوئی امام نہیں

شمیم آلِ محمدﷺ سے بس رہا ہے دماغ

ہوائے غیر ہو جس میں یہ وہ مشام نہیں

شمیم امروہوی