شمیم اس کلمۂ وحدت کا ہر دم دھیان رکھتا ہے

 عارفانہ کلام حمد نعت منقبت

سلامی جاں گزا ہے رنج و غم خاصانِ داور کا​

قلق سبطینؑ کا زہراؑ کا حیدرؑ کا پیمبرﷺ کا​

سدا شہرہ رہے گا جود و خلق و زورِ حیدرؑ کا​

قطار و شیر و انگشتر کا دَر کا روح کے پر کا​

علیؑ کی تیغ کے دم سے ہوا ہر معرکہ فیصل​

احد کا بدر کا صفین کا خندق کا خیبر کا

​یہ پانچوں سُورے اے دل پنجتن کی شان میں آئے​

قمر کا شمس کا رحمان کا مریم کا کوثر کا​

فدائے شاہ ہو کر حُر نے کس کس کا شرف پایا​

اویس و زید کا عمار کا سلماں کا بوذر کا​

نشاں مٹ کر وفاداری میں کیسا نام نکلا ہے​

ظہیر و مسلم و وہب و حبیب و حُرِ صفدر کا​

غلامِ پنجتن کو ڈر نہیں ان پانچ چیزوں کا​

اجل کا جاں کنی کا قبر کا برزخ کا محشر کا​

ملا ہے رونے والوں کو ثواب اک آہ میں کیا کیا​

صلوة و صوم کا خمس و زکوة و حجِ اکبر کا​

سوائے تشنگی شبیرؑ کو ایک ایک صدمہ تھا​

بھتیجوں بھانجوں کا بھائی کا اکبرؑ کا اصغرؑ کا​

برابر زخم پر ہے زخم شہؑ کے جسمِ اطہر پر​

تبر کا تیر کا تلوار کا نیزے کا خنجر کا​

غضب ہے اتنے صدمے ایک جانِ خواہرِ شہؑ پر​

ردا کا قید کا بچوں کا اکبرؑ کا برادر کا​

سکینہؑ لے گئی یہ پانچ داغ اس باغِ عالم سے​

طمانچوں کا رسن کا باپ کا سقے کا گوہر کا​

چلے بیمار یا کانٹے چنے یا غل سنے ہے ہے​

سلاسل کا پسر کا ماں پھوپھی کا چھوٹی خواہر کا​

تڑپ کر کہتی تھی بانو کروں کس کس کا میں ماتم​

جواں کا، طفل کا، داماد کا، دختر کا، شوہر کا​

قیامت ہے نئی بیاہی سہے بچپن میں کیا کیا غم

پدر کا بھائی کا گھر کا رنڈاپے کا کھلے سر کا​

تہِ خنجر امامِ پاکؑ کو کس کس کا دھیان آیا​

بہن کا، بیٹی کا، بیمار کا، امت کا، محضر کا​

تپِ ہجراں میں جلنے کو چراغ اک رہ گیا باقی​

نبیﷺ و فاطمہؑ کا حیدرؑ و شبیرؑ و شبرؑ کا​

شمیم اس کلمۂ وحدت کا ہر دم دھیان رکھتا ہے​

میں بندہ ایک کا دو تین کا نو کا اکہتر کا​

​

شمیم امروہوی