الگ ہی قسم کا اک تجربہ ہم کرنے والے ہیں
ترے ہوتے ہوئے بھی تیرا ماتم کرنے والے ہیں
تِرے چہرے کی تابانی میں بینائی گنوا بیٹھے
تجھے شدت سے اتنی دیکھنا کم کرنے والے ہیں
اے دل، شہر نگاراں، اب تجھے مسمار کرنا ہے
تِرے ملبے سے ہم خود کو فراہم کرنے والے ہیں
یہ کمرے میں جو بکھری ہیں کتابیں اور تصویریں
بہل جائے یہ دل پھر سب منظّم کرنے والے ہیں
تِری حد دیکھنا ہے اس لیے اب اے شبِ تیرہ
اجالا کر کے تجھ کو اور برہم کرنے والے ہیں
ندیم ظہیر
No comments:
Post a Comment