عارفانہ کلام حمد نعت منقبت
عرشِ اعلیٰ پہ ہے حضرت کا قدم آج کی رات
کُھل گیا طائرِ سِدرہ کا بھرم آج کی رات
اُمتی جتنا کرم لوٹیں ہے کم آج کی رات
سامنے حق کے ہیں سلطان اُمم آج کی رات
عبد و رب میں نہ رہا پردۂ حائل کوئی
مٹ گیا فرقِ حدوث اور قدم آج کی رات
قاب قوسین کی روداد کا اجمال ہے یہ
ہو گئے عاشق و معشوق بہم آج کی رات
کھل گیا راز الیٰ عبدہٖ ما اوحیٰ سے
ذاتِ حق خود ہوئی مائل بہ کرم آج کی رات
دیکھ کر نازشِ آدم کی یہ شان پرواز
گھٹ گیا سینے میں ابلیس کا دم آج کی رات
آپ کے صدقے میں اُمت نے بھی پایا ہے عروج
خیرِ اُمت کا لقب پا گئے ہم آج کی رات
سن کے اعلان کہ مومن کی ہے معراج نماز
رقص کرنے لگے خود لوح و قلم آج کی رات
نسبت نقشِ قدم ہی کو سمجھ لے بے ہوش
تجھ کو نعلین محمدﷺ کی قسم آج کی رات
بے ہوش محبوب نگری
No comments:
Post a Comment