ظلم ہوتا ہے تو زنجیر ہلا دیتا ہوں

 ظُلم ہوتا ہے تو زنجیر ہلا دیتا ہوں 

نیند سے ظِل الہیٰ کو جگا دیتا ہوں 

مجھ کو تاریخ سے نِسبت ہے تو بس اتنی ہے

روز بچوں کو نیا جھُوٹ سنا دیتا ہوں 

آج بھی چھیڑ کے تقسیم کا خُونی قصہ 

اپنے ماں باپ کو اکثر میں رُلا دیتا ہوں 

جب بھی ملنے کا ارادہ ہو کبھی بچپن سے 

اپنے بچوں کے کھلونوں کو چُھپا دیتا ہوں 

رازق و رِزق کے افسانے کا مزا اپنی جگہ 

جو کماتا ہوں وہی ماں کو تھما دیتا ہوں

آج بھی چھُٹتی نہیں عادت وہ پرانی اپنی 

لا کے مسجد سے میں بچوں کو پڑھا دیتا ہوں

خواجہ جمشید امام