شان سے جانب مقتل شہ ذی شان گیا

 عارفانہ کلام حمد نعت منقبت

شان سے جانبِ مقتل شہِؑ ذی شان گیا

دینِ احمدﷺ کا بڑھاتا ہوا وہ مان گیا

ایسا رُتبہ کہ چلا رب سے ملاقات کو جب

نوکِ نیزہ پہ بھی پڑھتا ہوا قرآن گیا

جس کو مخلوقِ میں رکھا تھا خدا نے افضل

بربریت کی ہر اک حد پہ وہ انسان گیا

اہلِ دیں، ظلم و ستم اور یزیدی نرغہ

"کربلا آج مِرا تیری طرف دھیان گیا"

نکلا طیبہ سے تو پھر شام، نجف کربل تک

پھیلتا نورِ رسالتﷺ کا گُلستان گیا

منقبت، مرثیے، نعت اور درودوں کے گُلاب

پیچھے دل، آگے عقیدت کا یہ سامان گیا

دین کے نام پہ گھر اپنا لُٹایا شہؑ نے

دے کے وہ نامِ وفا کو نیا عنوان گیا

بشریٰ فرخ