دن رات ہے رحمت کی برسات مدینے میں

 عارفانہ کلام حمد نعت منقبت

دن رات ہے رحمت کی برسات مدینے میں

اک عمر سے بہتر ہے اک رات مدینے میں

اقصیٰ بھی مقدس ہے کعبہ بھی مقدس ہے

پر سب سے نرالی ہے اک بات مدینے میں

ہر زائر طیبہ کی پیشانی ملک چومے

بڑھ جاتے ہیں انساں کے درجات مدینے میں

خوش بخت ہے وہ جس کو دیدار محمدﷺ ہو

کھل جاتی ہے آنکھوں کی اوقات مدینے میں

جس نور سے روشن ہیں یہ شمس و قمر دونوں

اس نور کے دیکھے ہیں ذرات مدینے میں

جنت کا تصور تھا دیکھا جو وہاں جا کر

جنت سے بھی بہتر ہیں حالات مدینے میں

بے ہوش کے دامن میں کچھ اشک کے موتی ہیں

پہونچا دے خدارا یہ سوغات مدینے میں

بے ہوش محبوب نگری