عارفانہ کلام حمد نعت منقبت
نور مطلق کے رنگیں نظارے کہاں
رُوئے احمدﷺ کہاں چاند تارے کہاں
مل سکیں گے یہ دونوں کنارے کہاں
عشق اپنا کہاں حق کے پیارے کہاں
چاند شق ہو گیا،۔ آبرو پا گیا
یہ کہاں اور ان کے اشارے کہاں
سبز گنبد حجاب نظر بن گیا
سچ تو یہ ہے محمدﷺ سدھارے کہاں
ہم کو لے دے کے اس در کا ہے آسرا
اُٹھ کے جائیں نگاہوں کے مارے کہاں
کالی کملی نہیں بحر رحمت ہے یہ
منہ چھپائیں گے عصیاں کے دھارے کہاں
آپﷺ کے ہوتے اے سرورِ انبیاء
ڈھونڈنے جائے اُمت سہارے کہاں
بجلیاں تاک میں ہیں مدد کیجیے
اک نشیمن کہاں، سو شرارے کہاں
خاکِ نعلین ملنا بھی معراج ہے
اتنے اونچے مقدر ہمارے کہاں
یاد فرمائیے اپنے بے ہوش کو
ہجر میں زندگانی گزارے کہاں
بے ہوش محبوب نگری
No comments:
Post a Comment