دربار رسالت میں عجب جلوہ گری ہے

 عارفانہ کلام حمد نعت منقبت

دربار رسالت میں عجب جلوہ گری ہے

اک جلوۂ پُر نُور کی چادر سی تنی ہے

وہ ذاتِ گرامی ہے شہنشاہِ اُممﷺ کی

جن کے لیے کونین کی تخلیق ہوئی ہے

پلکیں بھی جھکاؤ تو سلیقے سے جھکاؤ

دربارِ نبیﷺ ہے ارے دربارِ نبیﷺ ہے

رضواں کو ہوں جنت کے در و بام مبارک

میرے لیے سب کچھ تو مدینے کی گلی ہے

اللہ رے وہ نقشِ کفِ پائے محمدﷺ

جس پر کہ جبیں عرش کی سو بار جھکی ہے

ہر چند گنہ گار و سیہ کار ہوں، لیکن

سرکارﷺ مدینہ سے مِری آس لگی ہے

کوتاہئ داماں ہے مِری ورنہ اے آفاق

کس چیز کی دربارِ رسالتﷺ میں کمی ہے

آفاق فاخری