شایان عطا بارئ درگاہ خدا مانگ

 عارفانہ کلام حمد نعت منقبت

شایانِ عطا بارئ درگاہِ خدا مانگ

دیدارِ رخِ سیدِ عالمﷺ کی دعا مانگ

نظارۂ تصویرِ شہِ کون و مکاں میں

ہر لحظہ فنا مانگ فنا مانگ فنا مانگ

کر رُویتِ یزداں کے لیے ان کو وسیلہ

آنکھوں کے لیے روشنئ غارِ حرا مانگ

جاں مہکے نفس ہائے پیمبر کے اثر سے

اس کوچۂ تطہیر کی تو آب و ہوا مانگ

اے تشنہ بلب یہ ہے درِ ساقئ کوثرﷺ

قطرے پہ نہ جا دجلۂ مواجِ صفا مانگ

غیروں کی کسی بات پہ دھر کان نہ اپنے

بھیجا ہے خدا نے تجھے ہے تجھ کو روا مانگ

مانگ ان سے انہی کو کہ بڑی مانگ یہی ہے

اے بندۂ مجذوب نہ کچھ اِس کے سوا مانگ

جیسا ہے جہاں ہے وہ تجھے سنتے ہیں پیہم

اس شاہﷺ کے دربار میں فریاد اٹھا مانگ

پاپوش تلک جس کے کوئی کشف نہ پہنچا

اس بنتِؑ محمدﷺ کا ادب مانگ حیا مانگ

یہ واسطہ رد کرتے نہیں سیدِ عالمﷺ

اک بار تو خیراتِ درِ آلِ عباؑ مانگ

محشر میں اٹھے پہلوے سرکارؐ سے رازی

ہر وقت مضافاتِ مدینہ میں قضا مانگ

میرزا امجد رازی