عارفانہ کلام حمد نعت منقبت
میں تیری آل کی عظمت پہ قرباں یا رسول اللہﷺ
میں تیرے نام کی نسبت پہ قرباں یا رسول اللہﷺ
وہ جن کو آیۂِ تطہیر کی برکات حاصل ہیں
میں ان کی عفت و حرمت پہ قر باں یارسول اللہﷺ
مِرے ماں باپ ، میری اہلیہ ، اولاد بھی آقاﷺ
کروں سب آپ کی عترت پہ قرباں یا رسول اللہﷺ
وہ جن کو پارۂ جاں آپ نے آقاﷺ تھا فرمایا
کروڑوں جانیں اس قربت پہ قرباں یا رسول اللہﷺ
کوئی دولت کوئی عزت کو ئی شہرت پہ مرتے ہیں
مگر میں آل کی رفعت پہ قرباں یا رسول اللہﷺ
زباں خاموش ،آنکھیں با وضو ، دل دم بخود آقاﷺ
حیا بھی نزہتِ جنت پہ قرباں یا رسول اللہﷺ
کہا تھا ھٰٓوُلاءِ اہل بیتی آپﷺ نے جن کو
میں ان کی بالیقیں عظمت پہ قرباں یا رسول اللہﷺ
شرافت بھی نجابت بھی طہارت بھی نظافت بھی
سبھی ہیں آل کی نزہت پہ قرباں یا رسول اللہﷺ
میں اہل بیت کی حرمت پہ آقاﷺ ڈھال بن جاؤں
کروں ناموس بھی عترت پہ قرباں یا رسول اللّٰہﷺ
یہ میری زندگی کس کام کی ہے سرورِ عالمﷺ
نہ ہو جب تک تِری عترت پہ قرباں یا رسول اللہﷺ
ظفر نے دین و دنیا میں ہیں جو بھی عزتیں پائیں
تِریﷺ ہی آل کی عزت پہ قرباں یا رسول اللہﷺ
ظفر اقبال نوری
No comments:
Post a Comment