قصیدہ پڑھتے ہوں پہلی قطار میں کھڑے ہوں

 عارفانہ کلام حمد نعت منقبت

قصیدہ پڑھتے  ہوں پہلی قطار میں کھڑے ہوں

حضُورﷺ آئیں تو ہم انتظار میں کھڑے ہوں

قدم قدم پہ  جمی ہوں نگاہیں رستے پر

خمارِ دیدہ لیے ہم خمار میں کھڑے ہوں

حضورﷺ قصویٰ پہ ہو کر سوار آئیں اور

ہم ایسے دشتِ عرب کے غُبار میں کھڑے ہوں

اُتر رہے ہوں فلک سے ملک سلامی کو

چمن کے پھُول بھی اپنے نکھار میں کھڑے ہوں

برس رہی ہو زمانوں پہ بارشِ رحمت

ہم ایسے عاصی بھی رم جھم پھُوار میں کھڑے ہوں

زمانہ دیکھ رہا ہو نئی رُتوں کی طرف

مہکتے پھولوں کی پہلی بہار میں کھڑے ہوں

وہ وقت آئے کہ ہم اپنی قسمتیں لے کر

حضورِ محرمِ لیل و نہار میں کھڑے ہوں

تڑپ رہے ہوں کہ اُن کی جھلک نظر آئے

ہو بے قراری بھی لیکن قرار میں کھڑے ہوں

جنید آزر