ذہن کو مفلوج مت کر سوچ سے عاری نہ کر

 ذہن کو مفلوج مت کر سوچ سے عاری نہ کر

تُو مِرا غم خوار ہے تو میری غم خواری نہ کر

یوں مسیحائی کو جِدت کا کوئی انداز دے

مجھ پہ میری زندگی کا خوف تو طاری نہ کر

پھر دکھا کر خواب وحشت ناک لمحوں کے مجھے

منجمد جو خوں رگوں میں ہے اسے جاری نہ کر

بے سبب مجھ پر مِری تعریف کی بارش نہ کر

میں تو رُوئی سے بھی ہلکا ہوں مجھے بھاری نہ کر

میں رگ ہر سنگ میں پیوست ہو جاؤں کنور

تُو اگر پابند میری برق رفتاری نہ کر

اعجاز کنور راجا