کبھی تہی مرے دل کا حرم نہیں اے دوست

 کبھی تہی مِرے دل کا حرم نہیں اے دوست

خدا خدا ہے خیالی صنم نہیں اے دوست

یہاں کا حسن رہا بے نیازِ نظارہ

حریمِ کعبہ ہے بیت الصنم نہیں اے دوست

عجیب شے مِری قسمت کا بل ہے میرے لیے

اگرچہ یہ کوئی زلفوں کا خم نہیں اے دوست

خدا ہے اپنی جگہ، اور تم ہو اپنی جگہ

نکال دیں تمہیں دل سے وہ ہم نہیں اے دوست

سرور بخش نہیں مے کشی تمہارے بغیر

ہمارے پاس مگر جامِ جم نہیں اے دوست

تمہارے جلووں سے ہوتی نہیں طبیعت سیر

ہمیں اگرچہ غم بیش و کم نہیں اے دوست

خدا کو اپنا بنانا بھی کوئی کھیل نہیں

مگر خدا کی قسم تم بھی کم نہیں اے دوست

ہمارے دم پہ بنی ہے غمِ محبت سے

خدا کا شکر تمہیں کوئی غم نہیں اے دوست

کسی کی شرم و حیا کا نہیں کوئی مفہوم

ہمارا شوق اگر اس میں ضم نہیں اے دوست

یہ میں، یہ تم، یہ جہاں اور یہ جہاں والے

کسی وجود کا قائل عدم نہیں اے دوست

بہت دنوں سے یہ آصف کو ہوتا ہے محسوس

کہ جیسے اس پہ تمہارا کرم نہیں اے دوست

آصف بنارسی