وجود سید عالم نشان رحمت ہے

 عارفانہ کلام حمد نعت منقبت

وجودِ سیدِ عالمﷺ نشانِ رحمت ہے

زمانے بھر پہ یہی سائبانِ رحمت ہے

محمدﷺ و علیؑ و زہراؑ و حسینؑ و حسنؑ

یہ خانداں ہی فقط خاندانِ رحمت ہے

اسی کا ذکر تو قرآں میں حق نے فرمایا

"حضور! آپﷺ کا اُسوہ جہانِ رحمت ہے"

جو تھامتی ہے مصائب میں امتی کا وجود

مِرے کریم کی سیرت ہے، جانِ رحمت ہے

یہ جاں کے پیاسوں کی خاطر بھی ہے کرم گُستر

مزاجِ سیدِ کونینﷺ کانِ رحمت ہے

پکڑ لو دامنِ اصحاب و آلِ مِیرِ اُممﷺ

یہ کاروان نہیں کاروانِ رحمت ہے

عذاب آئے گا یک بارگی نہ اب ہرگز

یہ مصطفیٰؐ کا ہے صدقہ، یہ شانِ رحمت ہے

سیاہ کارو! چلو شہرِ نور کی جانب

زمیں پہ ایک وہی آستانِ رحمت ہے

نہیں ہے اس میں کسی فرد کو کلام ازہر

مِرے کریم کی سیرت بیانِ رحمت ہے

اویس ازہر مدنی