نے ہجر چاہتا ہوں نہ وصل حبیب کو

نَے ہجر چاہتا ہوں نہ وصلِ حبیب کو

یا رب کہیں ہو صبر دلِ نا شکیب کو

وے بھی تو آدمی ہیں کہ جن سے تمہیں ہے ربط

کیا شکوہ تم سے،۔ روئیے اپنے نصیب کو 

اپنے لیے کہے ہے تمہیں کون، کچھ کرو

لیکن بہت برا ہے ستانا غریب کو

اصلاح کا جنوں کی مِرے نِت اسے ہے فکر

یہ کیا دِوان پن ہے الٰہی طبیب کو

بلبل نہ کر دراز زباں تُو کہ گُل کے یاں

خاموشی پر قفا سے نکالیں ہیں جیب کو

آدابِ ناز جن نے سکھائے تمہیں ہیں شوخ

مقدور ہو تو دیجے ادب اس ادیب کو

قائم سخن سرا ہے وہ اس ڈھنگ سے بھلا

تَیں بولتے سنا ہے بہت عندلیب کو

قائم چاند پوری