اک ایسا مرحلۂ رہ گزر بھی آتا ہے

اک ایسا مرحلۂ رہگزر بھی آتا ہے

کوئی فصیلِ انا سے اتر بھی آتا ہے

تِری تلاش میں جانے کہاں بھٹک جاؤں

سفر میں دشت بھی آتا ہے گھر بھی آتا ہے

تلاش سائے کی لائی جو دشت سے تو کھلا

عذاب صورتِ دیوار و در بھی آتا ہے

سکوں تو جب ہو کہ میں چھاؤں صحن میں دیکھوں

نظر تو ویسے گلی کا شجر بھی آتا ہے

لہو سے حرف تراشیں جو میری طرح امید

انہیں کے حصہ میں زخمِ ہنر بھی آتا ہے

امید فاضلی