کمان ہاتھ میں رکھتے تھے دھیان کاندھے پر
ٹِکی نہیں ہے مگر آن بان کاندھے پر
جمے نہیں تھے ابھی خاکدان پر پاؤں
کہ آخر آن گِرا آسمان کاندھے پر
ہمارے لہجے میں تھوڑا سا عجز کیا آیا
کہ اب سوار ہے سارا جہان کاندھے پر
کسی نے جھانک کے دیکھا نہیں دریچے سے
لیے لیے پھرے ہم داستان کاندھے پر
کسی کے پاس ہے دنیا کسی کے ہاتھ میں دین
سجا رکھی ہے سبھی نے دکان کاندھے پر
میں تھک گیا تو زمیں پر پٹخ دیا اک دن
بہت اٹھا کے پھِرا خاندان کاندھے پر
ہم ایسے لوگ گدھوں کی ہنسی اڑاتے ہیں
جو لے کے پھِرتے ہیں سارا جہان کاندھے پر
اسے تو مر کے بھی مٹی نہیں نصیب یہاں
اٹھائے پھرتا ہے جو خاک دان کاندھے پر
تِرا شمار غلاموں میں گِر نہیں ہوتا
تو پھر یہ کیسا ہے تیرے نشان کاندھے پر
بچے تو کیسے کوئی اُن کے وار سے عُرفی
جو لوگ رکھے ہوئے ہیں زبان کاندھے پر
عرفان عرفی
No comments:
Post a Comment