تمہیں ہماری جو یاد آئے تو لوٹ آنا

 تمہیں ہماری جو یاد آئے تو لوٹ آنا

یہ ہجر تم کو جو کاٹ کھائے تو لوٹ آنا

مسافرت کا جنون طاری ہے سر پہ لیکن

کہ رہ میں مشکل جو پیش آئے تو لوٹ آنا

تمہاری یادوں کے دِیپ ہم نے جلا رکھے ہیں

اگر کوئی شمع ٹمٹمائے تو لوٹ آنا

خوشی کی ٹھنڈک نثار تم پہ کروں گی جاناں

غموں کی آتش تمہیں جلائے تو لوٹ آنا

اُجاڑ دنیا، اُجاڑ عالم، خزاں کا موسم

غزل ہماری جو گُنگنائے تو لوٹ آنا

تو لوٹ آنا جو باغِ خواہش کی بُو ستائے

کوئی جو تتلی تمہیں ستائے تو لوٹ آنا

مروّتوں کے ہیں باب ازبر اے میرے دلبر

اگر تُو منزل کی رہ نہ پائے تو لوٹ آنا

تمہیں قسم ہے اے ماہِ تاباں، اے جانِ جاناں

کوئی کسی کو اگر منائے تو لوٹ آنا

یہ در ہمارا کھُلا ہے اے رابعہ ہمیشہ

تمہاری آنکھوں میں اشک آئے تو لوٹ آنا

رابعہ ملک