فائدہ کیا حسرت بے رنگ کی تکمیل سے

 فائدہ کیا حسرتِ بے رنگ کی تکمیل سے

اس لیے نکلے نہیں ہم شوق کی تحویل سے

وہ سرِ محفل بڑھاتے جا رہے ہیں گفتگو

میں مگر کترا رہا ہوں بات کی تفصیل سے

وحشت و واماندگی بھی اب نہیں ہے جسم میں

اور میں آزاد ہوں ہر خواب کی تاویل سے

آسماں در آسماں اسرا ر مجھ پر کھل گئے

میں اُڑایا جا رہا تھا شہپرِ جبریل سے

وہ محبت کی کہانی کس طرح سے ختم ہو

جو شفق گوں شبنمی ہونٹوں کی ہے تمثیل سے

ہم میں پیدا کر دئیے اوصافِ ہابیلی مگر

فطرتِ دنیا بنائی فطرتِ قابیل سے

جس طرح تم اب کھلے ہو وقت کی اس دھوپ میں

کھل نہیں سکتا کوئی شہباز اس تعجیل سے

شہباز راجہ