مدام لے کے مجھے حلقہ وار ناچتی ہے
جدھر چلوں نگہِ طرحدار ناچتی ہے
ملا ہے وعدۂ فردا بجائے نقد وصال
ہماری روح کو دیکھو اُدھار ناچتی ہے
یہ کس نظر نے طلسمِ خزاں کو کاٹ دیا
پلک جھپکتے میں ہر سُو بہار ناچتی ہے
پھرے ملول وہ درگاہ کے احاطے میں
اور آئے وجد میں تو بے شمار ناچتی ہے
پٹخ کے سر کبھی روتا ہے ہجر کا آزار
امیدِ وصل کبھی بار بار ناچتی ہے
وحی نہیں اسے درکار اذنِ خاکی تھا
جو مل گیا تو یہ مُشتِ غبار ناچتی ہے
ہماری روح تبسم سخن کی ہے جوگن
غزل کے گر کہیں چھڑ جائیں تار ناچتی ہے
تبسم انوار
No comments:
Post a Comment