کسی کے درد سے وہ آشنا ہوتا تو کیا ہوتا

کسی کے درد سے وہ آشنا ہوتا تو کیا ہوتا 

کسی کے دل میں گر خوفِ خدا ہوتا تو کیا ہوتا 

خوشی رہ کر سدا مجھ سے وہ حکمِ قتل دیتا ہے 

خدا جانے اگر وہ بُت خفا ہوتا تو کیا ہوتا 

ابھی بندہ ہے وہ اس پر بھی اتنی ظلم رانی ہے 

خداوندا! اگر بندہ خدا ہوتا تو کیا ہوتا؟

مجھے کچھ موت کی پروا نہیں اے داور محشر 

یتیموں کا بھی کوئی آسرا ہوتا تو کیا ہوتا 

ابھی مہندی لگائی تھی ابھی خوں کر دیا میرا 

اگر رنگِ حنا اصغر چڑھا ہوتا تو کیا ہوتا 

اصغر نظامی