فروزاں شمعِ اُلفت ہے یہ پروانے کہاں جاتے
تِری محفل سے اٹھ کر تیرے دیوانے کہاں جاتے
سہارہ بس تمہارا ہے، ہمارا کون ہے اپنا؟
تمہارا چھوڑ کر در ٹھوکریں کھانے کہاں جاتے
پِلا کر مست کر ڈالا ہے ساقی نے نگاہوں سے
بھلا ساغر کو پینے اب یہ مے خانے کہاں جاتے
سجا رکھی ہے مُورت دل کے اندر بس تِری جاناں
بُتوں کو پُوجنے جاناں صنم خانے کہاں جاتے
تِرے در کی گدائی نے جہاں میں کر دیا مشہور
گدا تیرے نہ ہم ہوتے تو پہچانے کہاں جاتے
اگر ہم روبرو ہو کر نہ پیتے ان سے جو فیصل
نگاہِ یار سے چھلکے یہ پیمانے کہاں جاتے
فیصل گنوری
No comments:
Post a Comment