دھیان سے جب کبھی گرا دکھ ہے

 دھیان سے جب کبھی گِرا دُکھ ہے

دیر تک مجھ پہ چیختا دکھ ہے

اس لیے ہنس نہیں رہا ہوں میں

سوچتا ہوں کہ دیکھتا دکھ ہے

ایک جانب کو تیرے جانے سے

چاروں جانب سے آرہا دکھ ہے

دِن میں وہ بیٹھنے نہیں دیتا

رات جو مجھ میں جاگتا دکھ ہے

یاد ہے اُس حسیں دریچے کی

چاند ہے، میں ہوں اور تِرا دکھ ہے

موت پہ اس کی رو نہیں پایا

جانتا بھی تھا یہ بڑا دکھ ہے

ایک ہی شخص سے ہیں سب خوشیاں

ایک ہی شخص بانٹتا دکھ ہے

آج پھر زندگی کے ٹھیلے سے

اپنی مرضی کا لے لِیا دکھ ہے

یہ ہیں تیری تمام تر خوشیاں

اور یہ دیکھ، یہ مِرا دکھ ہے

وقت کے قہقہوں سے گھبرا کر

دل کے کونے میں چھپ گیا دکھ ہے

اپنے نام و نسب چھپاؤ نہیں

سب کو چہروں سے جانتا دکھ ہے

میں پیمبر ہوں کیا کوئی، جو تُو

روز مجھ پر اُتارتا دکھ ہے

غم تِرے غم کے گرد گھومتے ہیں

یعنی ہر دکھ کو کھینچتا دکھ ہے

روز گٹھری تمہاری یادوں کی

کھولتا ہوں تو پھیلتا دکھ ہے

جس جگہ روشنی نہیں جاتی

اس جگہ مجھ کو پھینکتا دکھ ہے

تجمل کاظمی