میں اپنے لفظوں میں شدت غضب کی لاؤں گی
نہ جانے دوں گی تجھے پیار سے مناؤں گی
ہواؤں کا بھی نہ جس پر کوئی اثر ہو گا
میں تیرے نام کا ایسا دِیا جلاؤں گی
اداسیوں کو مِری کوئی بھی نہ سمجھے گا
غموں کو ہنستے ہوئے میں گلے لگاؤں گی
شکستہ دل کو بھلا کیسے جوڑ سکتے ہیں
میں اپنے لفظوں سے جادوگری سکھاؤں گی
تُو چھوڑ جائے گا یہ وسوسہ بھی ہے دل میں
مگر یقیں ہے کہ تجھ کو میں ڈھونڈ لاؤں گی
تجھے چُرا نہ سکے گا کبھی کوئی دُوجا
میں تیرے نام پہ اپنی گِرہ لگاؤں گی
میں وہ نہیں کہ کسی کو اُجاڑ کر ہنس دوں
خسارے لے کے میں خوشیوں کو بانٹ آؤں گی
یہ جانتی ہوں مِرے بخت میں نہیں ہے وفا
رمل میں پھر بھی مقدر کو آزماؤں گی
رمل اقبال
No comments:
Post a Comment