میں یہ کہتا ہوں کہ لمحوں میں سمٹ سکتی ہے

 میں یہ کہتا ہوں کہ لمحوں میں سمٹ سکتی ہے

یہ اداسی تو تِری کال سے چھٹ سکتی ہے

اے مِری جان کے دشمن! تُو ذرا اور ٹھہر

تیرگی گھات میں ہے جا کے پلٹ سکتی ہے

شب کو ہر حال میں سونا بھی ضروری تو نہیں

رات بس رات ہے آنکھوں میں بھی کٹ سکتی ہے

ضبط بھی اپنی جگہ ہے مگر اے خاموشی

اتنا مت چیخ کہ شریان بھی پھٹ سکتی ہے

ایسی منہ زور اداسی ہے مِرے کمرے میں

جو تِری یاد کا تختہ بھی اُلٹ سکتی ہے

اویس علی