برا ہے درد پر آخر تری ضرورت ہے

 بُرا ہے درد پر آخر تِری ضرورت ہے

بدن سرائے مسافر تری ضرورت ہے

نہیں ہے کچھ بھی اگر سامنے نہیں تیرے

یہ آئینہ جو بظاہر تری ضرورت ہے

ہوا نہ ہو تو یہ سب پھول ہیں فقط رنگت

سو دیکھ لے کہ یہ شاعر تری ضرورت ہے

تجھے بُھلایا سہاروں کی بھیڑ میں جس نے

اس ایک شخص کو اب پھر تری ضرورت ہے

انا کے حکم پہ دشمن سے رابطہ مت توڑ

تِرے وجود کا منکر تری ضرورت ہے

یونہی سجا نہ خراشوں سے چشمِ آئینہ

ابھی ہجومِ مناظر تری ضرورت ہے

میں جانتا ہوں کہ اس میں نہیں ہے دل راضی

مگر یہ قیدِ عناصر تری ضرورت ہے

رفاقت راضی