رہ انجان پہ چلتے ہوئے ڈر لگتا ہے

 رہِ انجان پہ چلتے ہوئے ڈر لگتا ہے

میں اکیلا ہوں گزرتے ہوئے ڈر لگتا ہے

مجھے سچ بات پہ تہمت جو لگی کاذب کی

اب تو سچ بات بتاتے ہوئے ڈر لگتا ہے

مجھے دشمن کی صفوں میں بھی کئی دوست ملے

اب نئے دوست بناتے ہوئے ڈر لگتا ہے

چھوڑ کر ہاتھ میرا دل ہی نہ توڑے پھر سے

اب مجھے ہاتھ ملاتے ہوئے ڈر لگتا ہے

کہیں کھِلنے سے بغاوت نہ کریں سارے پھول

مجھے پھولوں کو مسلتے ہوئے ڈر لگتا ہے

اپنے کندھوں پہ اٹھایا ہے جو کارِ ابلیس

اب تو انسان سے ملتے ہوئے ڈر لگتا ہے

میرے حالات پہ ہنسنے لگے جب دیوانے

قصۂ درد سناتے ہوئے ڈر لگتا ہے

ہر گلی، چوک پہ بیٹھے ہیں لٹیرے سارے

اب نئے شہر بساتے ہوئے ڈر لگتا ہے

چور ظالم کا بسیرا ہے یہاں سڑکوں پر

اب مجھے شہر میں رہتے ہوئے ڈر لگتا ہے

کہیں کا فر ہی نہ کہہ دیں مجھے ایمان والے

سر کو سجدے میں بھی رکھتے ہوئے ڈر لگتا ہے

کہیں جنت کی ہوس میں نہ پھٹے پروانے

اب تو مسجد میں بھی جاتے ہوئے ڈر لگتا ہے

قتل کرتے ہیں یہاں دیکھ کے انسانوں کو

اب تو پہچان بتاتے ہوئے ڈر لگتا ہے

چُن کے مارے ہیں جو ہر شہر میں استادوں کو

اب مجھے علم سکھاتے ہوئے ڈر لگتا ہے

جب حکمران کے سائے میں ہو قاتل حیدر

مجھے اس دیس میں جاتے ہوئے ڈر لگتا ہے

جواد حیدر