عارفانہ کلام نعتیہ کلام
آقائے دو عالمﷺ کی اطاعت مِری منزل
محبوبِ خداوندﷺ کی مدحت مری منزل
میں خاکِ مدینہ ہوں، بشر نام ہے میرا
اس نسبتِ عالیٰؐ سے عبارت مری منزل
تقلید کفِ پائے محمدﷺ کی ہو توفیق
ہو انؐ کے اصولوں کی اطاعت مری منزل
کیا جانیۓ کب آئے میسر یہ حضوری
ہے روضۂ اقدس کی زیارت مری منزل
دنیا میں ہے منزل مِری دربارِ مدینہﷺ
عقبیٰ میں ہے آقاﷺ کی شفاعت مری منزل
جاگی ہوں کہ سوئی ہوں کہ زندہ ہوں کہ مُردہ
ہے آپﷺ سے ہر لمحہ عقیدت مری منزل
دھڑکن کی علامت ہو سدا نامِ محمدﷺ
بس آپﷺ سے ہو میری محبت مری منزل
رضیہ سبحان
No comments:
Post a Comment