سوئی رہی ہے ساری خدائی تمام شب

 سوئی رہی ہے ساری خدائی تمام شب​

دیتا رہا ہے کوئی دُہائی تمام شب​

جس کے لیے عدیم سجائی تمام شب​

اس نے تو شکل بھی نہ دکھائی تمام شب​

شاید پہل اسی کی طرف سے ہو بات کی​

اس انتظار میں ہی گنوائی تمام شب

​پلکوں پہ میں نے جشن چراغاں کئے رکھا​

میں نے تمہاری یاد منائی تمام شب​

دھوئیں تِری جدائی کے خط کی سیاہیاں​

تحریر آنسوؤں سے مٹائی تمام شب​

اِک اِک ستارہ سامنے میرے جڑا گیا​

لگتا تھا جیسے میں نے بنائی تمام شب​

تاروں کا رات سارے فلک پر ہجوم تھا​

وہ چاند تھا کہ دیکھنے آئی تمام شب​

چادر سیاہ، اس پہ ستارے بھی، چاند بھی​

اس نے تو اپنے سر پہ سجائی تمام شب​

تاروں کے جسم صبح کی چادر سے ڈھانپ کر​

میں نے سحر کے وقت سُلائی تمام شب

عدیم ہاشمی