ندائے کشمیر بہت مبارک میرے عزیزو

ندائے کشمیر

بہت مبارک

میرے عزیزو

تمہارے نعروں کی گونج سے دشمنوں کا دل 

بھی لرز گیا ہے

تمہارے پُر جوش بھاشنوں سے کسی کا جیون

سنور گیا ہے

میری رگوں سے جو پُھوٹتا ہے لہو کا دریا 

اُتر گیا ہے

جو چارہ گر مانتا تھا خود کو 

وہ عہد پورے بھی کر گیا ہے

یہ سب ہوا ہے تو پھر مبارک

تمہیں یہ فتح بہت مبارک

تو اب میرے ہاں جوان لاشے نہیں اٹھیں گے

سہاگ لٹتے تھے کل تلک جو، نہیں لٹیں گے

کہ میری بِٹیا کے سر کا آنچل نہیں چھنے گا

کوئی بدن اب ہوس کا ساماں نہیں بنے گا

نہ کھیلی جائے گی میرے سینے پہ خوں کی ہولی

نہیں لگے گی نا اب یہاں عصمتوں کی بولی

یہی ہوا ہے؟ بہت مبارک

نہیں ہوا کیا؟ 

سو سچ یہی ہے کہ ڈھونگ ہے جو رچا رہے ہو

مجھے یوں پاگل بنا رہے ہو

میرے حق میں کیا خوب نغمے بجا رہے ہو

تماش بیں ہو، تبھی تو تم کو یہ غم نہیں ہے

وجود تھا یہ جو ایک پنجر میں ڈھل گیا ہے

ادھورا پنجر

وہ ایک پنجر کہ جس کو گِدھ نوچ کھا رہے ہیں

اور نوچ کھا کر 

اسے وہ اپنے بدن کا حصہ بتا رہے ہیں

سو جب مقدر کی یہ سیاہی نہیں چھٹی ہے

میری دنیا ابھی بھی ٹکڑوں میں ہی بٹی ہے

تو نعرے بازی، فضول بهاشن

اور لغو ناٹک ہی چھوڑ دو نا

کہ جو دکھاوے کا مجھ سے بندھن 

بنا رکھا ہے وہ توڑ دو نا

ثمن ابرار