شیخ کو کعبے سے جو مقصود ہے

 شیخ کو کعبے سے جو مقصود ہے

وہ کنشتِ دل ہی میں موجود ہے

میرے جلنے کی کسی کو کیا خبر

سوزشِ دل آتش بے دُود ہے

نے حرم سے کام ہے نے دیر سے

خانۂ دل ہی مِرا مسجود ہے

فرق مت کر عاشق و معشوق میں

خود ایاز اور آپ ہی محمود ہے

کیا پری کیا حور کیا جن و بشر

سب میں وہ شاید مِرا مشہود ہے

مشربِ عشّاق میں اے زاہدو

اس کا جو مخلوق ہے معبود ہے

کس سے اے جوشش کہوں میں دردِ دل

میرے اس کے بولنا مفقود ہے

جوشش عظیم آبادی