دور ہوں ان سے سزا ہے یہ بھی

عارفانہ کلام نعتیہ کلام

دور ہوں انؐ سے، سزا ہے یہ بھی

پاس ٹھہروں انؐ کے دعا ہے یہ بھی

اہلِ نسبت کو وہﷺ پہچانتے ہیں

میرے مولا کی عطا ہے یہ بھی

اور کیا نکہتِ فردوسِ بریں

بس مدینے کی ہوا ہے یہ بھی

اُنﷺ کا جلوہ نظر آ جائے گا

حشر میں ایک مزا ہے یہ بھی

وہؐ مِرے دل ہی نہیں، جان بھی ہیں

میں نے محسوس کِیا ہے یہ بھی

غم تو ہے عِشقِ نبیؐ میں حاصل

شُکر کر، شُکر کی جا ہے یہ بھی

ہوش کھو بیٹھے نصیر اہلِ نظر

دیکھ لینے کی ادا ہے یہ بھی

سید نصیرالدین نصیر