زمزم عشق سے دھو دھوکے نکھارے الفاظ

عارفانہ کلام نعتیہ کلام

 زمزم عشق سے دھو دھوکے نکھارے الفاظ

میں نے تب نعتﷺ کی تختی پہ اتارے الفاظ

جن کی جنبش سے بنے نور کے دھارے الفاظ

ان لبوں سے ہیں معنون مِرے سارے الفاظ

ڈال دوں گا سر میزان یہ نعتوں کی بیاض

پورا کر دیں گے مِرے سارے خسارے الفاظ

آج بھی کہتے ہیں آقاﷺ کے مقدس خطبات

موڑ دیتے ہیں یم زیست کے دھارے، الفاظ

جب جلے وادئ ظلمت میں درودوں کےچراغ

نصب کرنے گے کرنوں کے منارے، الفاظ

یا نبیﷺ! ان کو بھی دے دیجیے اعزاز قبول

آج پھر لائے ہیں کچھ تازہ شمارے الفاظ

مضطرب کیوں ہے تلاطم سے، تنجینا پڑھ

تیری کشتی کو لگا دیں گے کنارے الفاظ

نعت سرکارﷺ کی لکھتے رہو ان شاءاللہ

تولے جائیں گے بہشتوں سے تمہارے الفاظ

نذرِ مدحت مِری دربار نبیﷺ تک پہنچی

جنتِ نور کے کرتے ہیں نظارے الفاظ

دست جبریلؑ نے جب خامۂ مدحت تھاما

دامن چرخ بنا لوح، ستارے الفاظ

وعظ فرماتے ہیں منبر پہ رسولِ اُمی

لینے آئے ہیں تمدن کے ادارے الفاظ

رائیگانی کا کوئی خوف نہیں ہے مجھ کو

پا گئے آپﷺ کے مضبوط سہارے، الفاظ

جب بھی دربار محمدﷺ سے بلاوا آئے

ساتھ لے لینا مجھے بھی مِرے پیارے الفاظ

ان کی خدمت میں کروں عرضِ تمنا کیسے

لب پہ آتے ہی نہیں خوف کے مارے، الفاظ

ان کو تاثیر کی خیرات عطا ہو سرکارﷺ

آستاں پر ہیں کھڑے ہاتھ پسارے، الفاظ

میرے حرفوں نے نصیر! آخری منزل پا لی

دل نے جب انؐ کی سماعت سے گزارے الفاظ

نصیر سراجی