ڈھونڈ پائے نہ کبھی ہم دل انساں جاناں

 ڈھونڈ پائے نہ کبھی ہم دلِ انساں جاناں

ہائے کس سِیپ میں رکھا ہے یہ مرجاں جاناں

ہم کہاں بُھولے تِرا روئے نگاراں جاناں

روز سجتا ہے اسی سے تو شبستاں جاناں

شعلۂ یاد پہ رہنے لگا رقصاں جاناں

ہائے تڑپا ہے یہ کتنا دلِ ناداں جاناں

زندگی قید تھی، گو دہر تھا زنداں جاناں

’’ہم نے جیسے بھی بسر کی تِرا احساں جاناں‘‘

روح رہتی ہے تِرے کوچہ میں رقصاں جاناں

’’دل پکارے ہی چلا جاتا ہے جاناں جاناں‘‘

یاد تیری میں ہوئے ہم جو غزلخواں جاناں

عمر بھر پھرتے رہے سر بگریباں جاناں

آ گیا راس ہمیں موسمِ ہجراں جاناں

اشکِ گلرنگ سے رنگیں ہے یہ داماں جاناں

ہم تو ہر رات ہی کرتے ہیں چراغاں جاناں

راستہ بُھول کے تُو ہو کبھی مہماں جاناں

ہم کو لاحق ہوا جب سے غمِ ہجراں جاناں

بھول بیٹھے ہیں کہ کیا ہے غمِ دوراں جاناں

دور سے چاند کیوں رکھے مجھے حیراں جاناں

کاش دیکھے مِرا پھیلا ہوا داماں جاناں

مجھ پہ صیاد نہ وا کر درِ زنداں میرا

شہرِ یاراں نہ رہا کر نہ تو احساں جاناں

پاس اتنا ہے کہ دھڑکتا ہے رگِ جاں بن کر

دور اتنا کہ کرے ہم کو پریشاں جاناں

میری تخلیق پہ پہلے تو کرایا سجدہ

پھر ملائک کو بنایا مِرا نگراں جاناں

درد کے چاند ڈھلا کرتے ہیں اکثر اس میں

دیکھ تو آ کے کبھی میرا شبستاں جاناں

وہ تو سِیماب ہے، ہر سمت بکھر جاتا ہے

بن نہ پائے گا میری مانگ کی افشاں جاناں

ریحانہ احمد جاناں